Die skoolkwartaal het skaars begin toe 86 graad 11 leerders saam met drie onderwysers vir ‘n dagbesoek vertrek het om die “Two Oceans Aquarium” in die Waterfront en die Kaapstad Museum te besoek.

HS Strand se Gr. 11 LW-leerders besoek Two Oceans Akwarium en Kaapstad MuseumDie leerders het reeds 7:45 na die akwarium vertrek waar hulle in twee groepe ingedeel is. Die een groep het solank die akwarium gaan verken terwyl die ander groep ‘n les in ‘n klas gekry het waar hulle aan seediere soos seesterre kon vat, terwyl ander gediertes in tenks om hulle geswem het. Na ‘n uur se verken, het die twee groepe omgeruil.

In die akwarium was daar allerhande interessante diere wat die leerders kon besigtig: ‘n hele kamer vol jellievisse, verskeie tenks met haaie in en ‘n tonnel waardeur jy kan stap terwyl haaie en pylsterte bo-oor jou kop swem.

Ná hierdie opvoedkundige uitstappie, het die graad elfs haastig vertrek om betyds by die Kaapstad Museum uit te kom.

By die Museum aangekom, is hulle na ‘n groot vertrek gelei waar daar ses tafels reggestaan het met skedels gerangskik! (Dit was gelukkig nie regte skedels nie, net nagemaaktes!)

Die graad elfs het die ongelooflike geleentheid gehad om met die (nagemaakte) skedels van gorillas, sjimpansees en mense te werk. Na hierdie geleentheid, kon almal die museum verder verken en die ongelooflike diere, visse en dinosourus fossiele ontdek.

Ongelukkig kom alle goeie dinge tot ‘n einde en het die Arende presies 14:20 by die skool gearriveer.