Hoërskool Strand se atletiekveld was Saterdag 15 September omtrent ‘n miernes van bedrywighede – ongeveer 480 atlete van 14 skole in die omgewing het aan hierdie pretbyeenkoms deelgeneem.

Daar was slegs 5 items – maar dit het geleentheid gebied  vir atlete wat aan 100m, 200m, 300m, 400m, 600m en 1600m wou hardloop. Die massa-aflos aan die einde – waar 7 spanne elk met 32 atlete tegelyk op die baan was, was beslis ‘n hoogtepunt.

Vir die hamergooiers en hoogspringers was daar ook geleentheid om aan ‘n voorseisoen-byeenkoms deel te neem en hul eie vermoë te meet.

Die volgende skole het toekennings vir verskillende afdelings gekry:

  • Drostdy se meisies as wenners van die mylaflos.
  • Hoër Jongenskool was die seunswenspan in die myl.
  • Die gekomineerde span van Hoër Meisieskool en Hoër Jongenskool was die wenners van die massa-aflos.
  • Die meisies van La Rochelle was die meisieswenspan van die dag.
  • Hoër Jongenskool die wenseunspan van die dag.